धनुषा, कार्तिक १२ गते ।
राजर्षिजनक विश्वविद्यालयले आफ्नो नवौँ वार्षिकोत्सव विभिन्न कार्यक्रमसहित सम्पन्न गरेको छ। विश्वविद्यालयले प्रशासनिक, शैक्षिक तथा परीक्षा प्रणालीलाई एकीकृत डिजिटल प्रणालीमा लैजाने घोषणा गरेको छ ।
विश्वविद्यालयले विद्यार्थीलाई अनलाइनबाटै सेवा उपलब्ध गराउने उद्देश्यले शैक्षिक, प्रशासनिक, परीक्षा र लेखासम्बन्धी कामलाई एकीकृत सञ्जालमा जोड्ने जनाएको छ। यसका साथै स्वास्थ्य विज्ञान सङ्कायको प्रभावकारी सञ्चालन, रोकिएका भौतिक पूर्वाधार निर्माण र प्रयोगशालालाई प्रविधिमैत्री बनाउने विषयलाई प्राथमिकता दिइएको छ।
विश्वविद्यालयले मधेश प्रदेशको आवश्यकता र बजारको मागअनुसार पाठ्यक्रम परिमार्जन गरी दक्ष तथा नवप्रवर्तनशील जनशक्ति उत्पादन गर्ने प्रतिबद्धता जनाएको छ। प्रशासनिक ढिलासुस्ती र बेथिति अन्त्य गर्दै कार्यशैलीलाई चुस्त बनाउने पनि विश्वविद्यालयले जनाएको छ।
वार्षिकोत्सवमा विश्वविद्यालयका उपकुलपति, रजिस्ट्रार, डिन, प्राध्यापक, कर्मचारी तथा विद्यार्थीको सहभागिता रहेको थियो।
